काठमाडौं, २२ कार्तिक
नेपाल पत्रकार मञ्चले पत्रकारिता तथा सञ्चार क्षेत्र राजनितिक हस्तक्षेपबाट अलग रहनु पर्नेतर्फ जोड दिएको छ । शनिबार काठमाडौंको भिलेज रिसोर्टमा अन्तरक्रियात्मक कार्यक्रमको आयोजना गर्दै मञ्चले पक्ष रहित पत्रकारिता विषयक बहस गरेको हो ।
मञ्चका अध्यक्ष युवराज विद्रोही सहितका शिर्ष पदाधिकारी तथा सदस्यहरु विच भएको अन्तरक्रियात्मक बहस कार्यक्रममा वर्तमान राजनितिक अवस्थाले सञ्चार क्षेत्रमा परेको प्रभाव र स्वयं संचारकर्मीको दायित्वमाथि छलफल भएको थियो ।
स्वयंमा जुनसुकै दलको भएपनि दलिय आस्थाको रंग सञ्चार क्षेत्रमा मिसिन नहुनेतर्फ जोड दिईएको बहस कार्यक्रममा मञ्चका महासचिव पत्रकार विमल थापाले दल प्रति व्यक्तिगत आस्था भएपनि कुनै पनि पत्रकारिता संवद्ध संघ-संस्था राजनितिक दलको पक्षधर हुन नमिल्ने बताएका छन् । राजनितिक दलको आडमा खुल्ने पत्रकारिता सरोकार संघ संस्थाले निस्पक्ष समाचार संप्रेषण गर्न नसक्ने दावि थापाको छ ।
त्यस्तै राष्ट्रिय सरोकार मञ्चका अध्यक्ष तथा संचार घर डटकमका सम्पादक पत्रकार सोम विक्रम सिंहले पत्रकारले दलिय तथा पक्षिय सिधान्त भन्दा अलग रूपमा समाज र देशलाई सर्वोपरि ठान्नु पर्ने तर्फ जोड दिएका छन् । । अन्तरक्रिया कार्यक्रममा बोल्दै सिंहले पत्रकारिता क्षेत्रमा देखिएका कमजोरीले सिंगो देशका जनता र समाजलाई प्रत्यक्ष प्रभाव पार्ने हुँदा सञ्चार गृह तथा संचारकर्मीले आफ्नो व्यक्तिगत स्वार्थ भन्दा पत्रकारिता आचार संहितभित्र रहेर राष्ट्रको चौथो अङ्गको रुपमा अहम भुमिका निर्वाह गर्नुपर्ने धारणा राखेका थिए ।
नेपाल पत्रकार मञ्चले विभिन्न समयमा पत्रकारिता क्षेत्रको अवस्था विषयक अन्तरक्रियात्मक कार्यक्रमहरु गर्दै आएको छ । जस मध्य शनिवारको कार्यक्रम पत्रकारिताको पेसागत मर्यादा, सामाजिक विश्वसनियता र देशप्रतिको कर्तव्य केन्द्रित देखिन्थ्यो । जसमा लामो समय देखि पत्रकारिता क्षेत्रमा क्रियाशिल पत्रकारले आ-आफ्ना अनुभव सहित पत्रकारिता क्षेत्रका समस्या र समाधान तर्फ केन्द्रित रहेको थियो ।
